بسم الله الرحمن الرحيم




{ السلام عليكم ورحمة الله وبركاته


يسعد ربي مساكم // صباحكم بكل خير وعافيه

يا هلا وغلا بكل حبيباتي اللي شرفوني بدخول موضوعي

وصفتنا اليوم لمحبين النوتيلا ومحبين الشكولاته بشكل عام

هو عباره عن طبقة من البسكويت المقرمش وفوقه

طبقه غنيه بطعم الشكولاته والنوتيلا كريمية القوام ,, حلاها معتدل

متماسكه من غير ما تكون جامده تذوب في الفم بمجرد ما تحطيها في فمك

وعليها خطوط من الغناش لتوازن الطعم وتعطي شكل جمالي ..

وهنا شكله بالبدايه


وصفت لكم الحلا وشفتو النتيجه ندخل الحين على المقادير والطريقه ~



للقاعده:~

علبة بسكويت دايجستف صغيره

زبده بمقدار نص اصبع زبده ابو 100 جرام يعني حوالي 50 جرام

ملعقة طعام كبيره سكر عادي

اول شيء نجيب صينية التشيز كيك واستخدمت صينيه مقاس القاعده 22 الى 24 سم عشان يطلع

التشييز مضبوط وارتفاعه حلو

قبل اي شيء انا وحده وسواسه بالوصفات احب اخذ احتياطاتي في كثير من الوصفات عشان ما

يروح تعبي خساره

وفي صينية التشييز كيك احب اسوي حركه عشان اضمن انه الماء ما يدخل على الصينيه ويخرب

كل الشغله مدري اذا تعرفونها او لا لكن اللي ما جربتها تسويها وتضمن نجاح التشييز كيك

المخبوز واللي تعرفها تسلك وتمشيها لي


اول شيء نجيب قصدير من النوع القوي ونفرشه على القاعده ونسكر الصينيه عليه ونخلي اطرافه برى







نطحن البسكويت في الخلاط [ياحبي لهالخلاط اغليه من غلا اللي اهدتني اياه ]

وما نكثر طحن خليه شبه مجروش وبعدين ضيفي عليه الزبده بعد ما تذوبينها مع ملعقة السكر





نفرش البسكويت في الصينيه ونرفعه على الاطراف شوي ونرصه باي شيء متوفر عندك [ انا


اضغطه بقاعدة الكأس ] وبعد كذا ندخله الفرن الساخن ونخليه لمدة 7 دقائق

عشان يتحمص البسكويت بعد كذا نطلع الصينيه ونخليها تبرد على بال ما نكمل الوصفه





مقادير خليط التشييز كيك :~

كوب نوتيلا [ المفروض في الوصفه 3\4 الكوب لكن صار الكوب كل ماله ينقص فحطيت الكوب كامل ]

جبنة فيلادلفيا 300 جرام

3\4 الكوب سكر

ملعقة صغيره فانيليا

1\2 كوب كريمة طازجه

220 جرام شكولاته حلوه [ استخدمت شكولاته بالحليب من وينراخ ]

2 بيضه كامله

2 صفار بيضه

المقادير لازم تكون بحرارة الغرفه


بخلط الجبنة مع النوتيلا الى ان يمتزج الخليط مع بعض





بعد كذا نضيف السكر ونخلط الى ان يمتزج الخليط ثم نضيف الكريمه والفانيليا ونكمل خلط





على بال ما الخلاط شغال نذوب الشكولاته في حمام مائي الى ان تذوب تماماً





نرجع لخليطنا

بعد ما ذابت الشكولاته نضيفها على الخليط ثم نضع البيض حبه حبه




وهذا شكل الخليط بعد ما انتهينا من إضافة كل المقادير



نغلف صينيتنا من الخارج بطبقتين من القصدير عشان راح نسويه بحمام مائي

ثم نصب الخليط فيها [ ترى هذه عباره عن فقاعات هواء مو كتل بالخليط ]






نكون مسخنين الفرن على 325 ºF وفي حمام مائي ندخل الصينيه

ونخليها لمدة ساعه وربع او اقل حسب حرارة كل فرن

راح تكون اطرافها تماسكت والوسط شوي طري ويهز معك



عشان نضمن ان اي تشييز كيك مطبوخ ما يهبط بسرعه نخليه بالفرن والباب مفتوح

بعد ما سكرنا حراره الفرن الى ان يبرد





بعد كذا ندخل صينيتنا الثلاجه الى ان يبرد والافضل يجلس اقل شيء 4 ساعات بعد
كذا نطلعه من الثلاجه ونكون عاملين غناش ونعمله على شكل خطوط متقاطعه





وهذا شكل التشييز بعد ما انتهينا منه





وهنا شكله من الجنب



نقطعه ونقدمه راح يكون متماسك




وهذه للي حابه تذوقه




اشوفكم على خير ودمتم بحب