هلا وغلااا صبااحكم وومسائــكم كاادي



وركبنا السفينه طبعا سعر التذكره تقريبا 150 دولارهونج كونج ذهاب وعوده
لكن حنا اخذنا باكيج كامل بسعر 750 دولار للشخص
داخل السفينه كان كل شي مرتب وكأنك ترك طائره مضيفين يورونك
مقعدك وكانت المقاعد فخمه ومريحه وكان فيه شاشات عرض

لبرامج سياحيه وعلميه تحتوي السفينه على طابقين ومطعم



هذي سفيتنا





الصينيين ماعندهم وقت يضيعونه تلقى كل واحد مطلع جهاز الكتروني ويشتغل فيه
ماهوب خويي اللي بس يلعب بسبحته>>>بيتمردغ

غادرنا ميناء هونج كونج الساعه 8 الصبح وبعد ساعتين وصلنا ميناء مكاو وقبل نطلع من ميناء هون كونج قالت لنا موظفة
المكتب السياحي انكم الوحيدين اللي يلزمكم فيزا ورسمت لي خارطه وقالت اذا وصلت مكاو امش على الخارطه




الصراحه كان وصفها دقيق كانوا كل المسافرين صافين سرا جنبنا على
كاونترات الجوازات ويطالعون فينا مستغربين ليه حنا
لحالنا عطيناهم جوازاتنا وجلسنا نعبي استمارات الفيزا وموظف الجوازات
يتصفح الجواز ويطالع بجواز خويي ويقوم وينادي
باقي الموظفين ويوريهم الجواز خويي قال وش السالفه
قلت والله مدري بس انت شبهه من ايام سيرلانكا قال الموظف بليززززز بطاقه
يوم قال بطاقه خويي جاته الصيحه
قلت وش تبون بالبطاقه قالوا بتاكا ماهو بطاقه هذي عملتنا
دفعنا 50 بتاكا واللي تعادل 50 دولار هونج كونج
كانوا المسافرين اللي يضحكون علينا مقهورين وحنا نخلص قبلهم لان
الاجرائات اخذت 3 دقايق بس

طلعنا بعدها ورحنا للمكتب السياحي المسؤل عنا وجلسنا 25 دقيقه ننتظر
باقي المسافرين اللي مشتركين معنا بنفس الرحله



وصلوا كل المسافرين الا شايب جلسنا ندوره لكن خويي ماشاء الله عليه حافظ
شكل الشايب حتى ملابسه يعرف وش لابس وراح
وجابه يوم جانا طلع اسرائيلي تحسفنا يوم جبناه لو درينا كان دفيناه بالبحر
اكتمل العدد وركبونا باص حجمه متوسط وكانت المرشده السياحيه اللي ترافقنا
صينيه تتكلم معنا بالانجليزي والصيني
واحمد ربك اذا لقيت صيني يعرف غير اللغه الصينيه



العلم


شعار مكاو



خارطة مكاو

تقع مكاو جنوب الصين وغرب هونج كونج ويفصل بينها وبين الصين
نهر تتكون مكاو من ثلاث جزر اكبرها العاصمه مكاو وجزيرة
كولون ثم الجزيره الصناعيه تايبا وفيها المطار ويربط بين الجزيرتين وجزيرة مكاو جسرين
مساحتها 28.2 كم مربع يعني مجمع الراشد اكبر
كانت مكاو تحت الاستعمار البرتغالي من القرن السادس عشر وحصلت على استقلالها ديسمبر 1999
اللغه الصينيه والبرتغاليه هي اللغه الرسميه وتستخدم الانجليزيه في الاماكن السياحيه والفنادق
اسم مكاو لم يكن الاسم الاصلي للبلد ولكن للاسم حادثه طريفه
كان يوجود بهذه الجزيره معبد بوذي مشهور اسمه مجاو وعند وصول
البرتغاليين الى الجزيره جاء احد الضباط الى صياد سمك
وسأله عن اسم هذه الجزيره ولكن الصياد لم يفهم مقصد الضابط
وكان يعتقد انه يسأل عن اسم المعبد قال له مجاو
ولكن اللهجه البرتغاليه غيرت الاسم الى مكاو
عدد السكان: 531,400
الديانه البوذيه وتمثل نصف السكان والكاثوليكيه الديانه الثانيه ويوجود ديانات اخرى
العمله بتاكا وهي تقريبا نصف ريال
تعتبر مكاو من الدول الغنيه ودخل الفرد عالي حيث يحضى
السكان على التعليم والرعايه الصحيه مجانا الى سن 18 سنه
وتعتمد مكاو في دخلها على التجاره والسياحه
والصراحه مكاو من انظف الدول اللي زرتها وبلد منظم
لاس فيجس الشرق
اطلق هذا الاسم على مكاو لانها تقارع لاس فيجس الامريكيه
ليس بمبانيها ولكن بكازينوهات القمار

اشتهرت مكاو عالميا بأنها مدينة القمار حيث تسمح به الدوله
قانونيا ويوجود بها اعلى مبنى قمار بالعالم











اكبر مبنى للقمار بالعالم وهو على شكل سنبله
يوجد في مكاو 27 كازينو مخصص للقمار ودخل مكاو يعتمد الى القمار والسياحه

كانت اول الاماكن اللي زرناها هي قلعة علاء الدين



قلعه علاء الدين






نسخه طبق الاصل لاحد البراكين والذي كان يثور كل مساء في مكاو وارتفاعه حوالي 40 متر




جانب من قلعة علاء الدين



بعدها ذهبنا الى برج مكاو
برج مكاو هو رقم 10 في أعلى مباني العالم و الثامن في آسيا
ارتفاعه الإجمالي 338 ولكن الشرفة الرئيسية على ارتفاع 223 متر تعادل مبنى من 72 طابق




تذكرة الصعود للشرفتين الداخلية والخارجية 75 بتاكا ويطل على النهراللؤلؤي





فيه داخل البرج شرفه دائريه تلف على البرج وارضيتها من الزجاج عشان الواحد يشوف الارض





لقطه من اعلى البرج لمكاو



يوجد مطعم وكوفي شوب داخل البرج








كاتدرائية سان باولو



هذا اشهر معلم سياحي في مكاو تشوفونه في قناة العربيه كل يوم
هذي كانت اقدم كنيسه في اسيا لكن احترقت الظاهر ورع كان يدخن ورى الكنيسه وولع فيها
بعد احتراقها مابقى منها الا هالجدار اللي صار اشهر منها



نزلت مع الممر هذا ودخلت شوارع صغيره



كان على اليمين وعلى اليسار محلات تبيع البسكوت ومكاو مشهوره بصناعة البسكوت

شوفوا الزحمه على البسكوت





افضل هديه الواحد ياخذها معه من مكاو هو بسكوت جوز الهند



طبعا كل المحلات يحطون عينات للتجربه وانا طبيت بالبسكوت وجربت
كل الانواع عشان اشتري
لكن يوم وصلت اخر نوع الا انا شبعان شربت ما وطلعت

وعندهم اعتقاد يقولون ان الماء هذا مقدس وكان عليه زحمه مدري تافل
فيه البوذا حقهم بس شكلهم نصابين لان طعمه عاااادي





انا يوم شفت هذا احسبه قمر الدين وجلست اكل واقولهم ليه ماهو زي اللي عندنا مالح هذا
قالوا ياخوي هذا لحم مجفف

قلعــــة مونت
قلعة برتغالية قديمة تقع بجانب أطلال كاتدرائية سان باولو لكن مشكلتها ان الوصول
لسطح القلعه متعب لان درجها عالي
يعني اذا بتطلع لازم تجي من بعيد وتاخذ عزم لكن اذا وصلت فوق بتشوف
منظر رائع لمكاو من فوق القلعه



لقطه لمكاو من فتحة الحصن

قلعة مونت بنيت عام 1616م وبنيت للدفاع عن الكنيسه قبل احتراقها عام 1838



احد المدافع فوق سطح القلعه

بـــــ لحظه ـــربـــ شـوي ـــــ

في فصل الصيف جو مكاو معتدل تقريبا وتكثر الامطار والحراره تقريبا 30 درجه



شوفوا اللوحه
يعني انت دبر عمرك

على غرار الشانزليزيه في باريس واكسفورد ستريت بلندن يقع ميدان النواب وسط مكاو وهو اشهر المناطق السياحيه




ميدان النواب اذا مشيت فيه كأنك تتمشى في اوروبا كل المباني اللي فيه طرازها
اوروبي والمقاهي والمطاعم المشهوره منتشره بكل مكان




من اشهر المطاعم في ميدان النواب مطعم مارجريت واذا طلبت قهوه لاتنسى تطلب معه فطيرة الدي ناتا وهي برتغاليه الاصل



فيه مقاهي حلوه مثل مقهى ناتا ومقهى اللورد في ميدان النواب
هالمقاهي دايم زحمه رحت بتقهوى فيها لكن مافيه امل
كانت زحمه بس الصراحه فنجال قهوه على هالجو مايتفوت قررت
اروح ستاربكس وجلساته الخارجيه حلوه والجو بالضل بارد

كنت امشي في ميدان سانديو وشفت ناس دخلوا مكان دخلت
معهم قلت بشوف وش السالفه



دخلت وشفت نوافير غريبه وحديقه صغيره وكانوا يطالعون فيني قالوا
خير وين رايح قلت بتفرج قالوا ياخوي هذا بيتنا

قلت واذا صار بيتكم يعني مايدخله الا انتم>>>بغى يتصفق



هذي المرشده حقتنا واللي على اليمين الشايب اليهودي اللي ضاع



وقت الغداء رحنا لمطعم كان محجوز لنا بالكامل وكان الغدا عباره
عن بوفيه مفتوح طبعا انا ما اعجبني اكلهم بعكس خويي
ماشاء الله عليه كل شي يمشي معه حتى الخنافس هواش هو الصينيين عليها

كل انواع الاكل تلقاها في مكاو المطبخ البرتغالي والصيني والهندي
و انصحكم بتجربة طريقة الديم سم وهي طريقه مشهوره في شرق اسيا



اشهر الاكلات في مكاو اكله اسمها باكلهو>>اخاف باكل هوا بس محرفه
باكلهو عباره عن سمك القد المجفف وينقع بالماء لمدة 20 ساعه لين ي
روح الملح اللي فيه وله اكثر من طريقه مشوي او مقلي او
مطبوخ او على شكل كرات ويقدم مع الرز انا جربته مع الرز
الصراحه ماهوب شين بس الرز اللهم لك الحمد احد يحط بالرز سكر
دام الرز بالسكر والدجاج بالعسل اجل وشلون الحلى حقهم





اكبر كنيسه في مكاو مع ان نسبة الكاثوليك قليله جدا لكن البرتغاليين هم اللي بنوها



سيارة الامام حق الكنيسه ماعنده لعب والله بنوراما ورقم مميز
مايصلي بالكنيسه الا خو وعياله

فيه اماكن كثيره تستحق الزياره في مكاو مثل المتحف الثقافي
ومتحف الفن ومتحف جراند بركس ومضمار لسباق الخيول
طبعا الخيول ماتسلم من المقامره عليها

راح تتفاجأ وانت تمشي بالشارع انك في حلبة سباقات سيارات



هنا تقام سباقات جراند بري للدرجات والسيارات لكن بعد نهاية السباق يرجع شارع عام



العمارات العاليه والمكتظه بالسكان من علامات مكاو
لانه يعيش نصف مليون شخص في منطقه صغيره جدا



طبعا السواقه عندهم زي هونج كونج دركسون يمين











المبنى هذا يشبه الامباير ستيت في نيويورك







الورع هذا معنا بالرحله وكان معه اخوانه ثنين وامه واشوف المرشده
مبتلشه فيهم تحاول تشرح لهم لكن ماهم فاهمين
وكانت تنادي وحده ثانيه تشرح لهم استغربت قلت يمكن من اليابان
سألتهم قالوا حنا صينيين قلت طيب وليه ماتفهمون
على كلام المرشده قالوا حنا لغتنا غير



صياد سمك مكاو



اي مبنى لونه احمر مبنى حكومي وفوقه علم الصين ومكاو
طبعا مكاو حكمها الداخلي خاص فيها ولها تشريع خاص لكن
السياسه الخارجيه مسؤله عنها الصين ومسؤله عن الدفاع عنها







طول الجسر 2.2 كم وبنوه عام 2004





شكلو غريب



كمبيوتر عملاق على احد المباني
يقولك اذا فتحوا المسنجر اللي بالصين يقرون المحادثه



خويي لقيته زعلان يقول تكاسيهم ماتوقف قلت له وين
التكسي قال هذا وكان يأشر على دورية الشرطه



شرطتهم كرولا وواجد عليهم اصلا الحرامي مايمديه ينحاش
بعد الظهر رحنا لاكبر واقدم معبد في مكاو عمره حوالي 200 سنه







اول ماوصلنا للمعبد كنا جوعانين ويوم شفت المحل هذا داخل المعبد ويطلع منه دخان رحت
للرجال وقلت بالله 2 زعتر قال وش زعتره قلت هذا ماهو محل معجنات قال لااااااا ياخي
هذا مدخل الغرفه اللي فيها الاله حق البوذا
قلت طيب الاهكم وش يطبخ بغى يخمني بصنم صغير



سله معبينها ما ويحطون فيه تبرعات الناس للمعبد قلت لخويي غط علي خلني اخذ من فلوس هالخبول
دخلت يدي وصرت اخذ من الفلوس بدون ما اطالع بالسله يوم طلعنا رحنا ورى المعبد نبي نشوف كم طلع معنا
يوم طلعتهم الا كل اللي اخذته اوراق شجر خخخخخخخخ





بغيت اجي واجلس جنب البوذا يمكن يرمون علي فلوس زيه بس خفت واحد يجي يولع شمعه ويشب بي
والا بوذي مسوي له مصيبه يقعد يصيح عندي



هذا الظاهر حارس المعبد



هذا القارب اللي فازت فيه مكاو في احد البطولات ومقدمة القارب راس تنين



العجوز اللي بالصوره ابلشتني قاعده تأشر لي من بعيد يوم
وصلت قلت وش تبين قالت ماتبي تشتري شمع عشان تولعه بالمعبد
قلت الا اذا عندك بانزين عطيني اولع بالمعبد



طبعا الجهه المقابله الصين ويقولون ان عيال مكاو وعيال الصين يتحاذفون بالحصى من قربهم
المهرجانات في مكاو غريبه وعجيبه وبعضها يخرع
بعطيكم بعض اسامي المهرجانات اللي تصير عندهم
مهرجان التنين السكران ويعتقدون انه يبعد مرض الطاعون
مهرجان الاسد النشيط مع ان الاسد مايحتاج يصير نشيط وهو نايم يخرع
مهرجان القبعه ويعتقدون انه يعالج المرضى
مهرجان استحمام اللورد
مهرجان مركب التنين وهو مهرجان لاحياء ذكرى شاعر عندهم اسمه واط رمى نفسه بالنهر احتجاجا على الفساد
مهرجان الاشباح وهذا تملي الشوارع بريحة البخور ويقدمون اللحم والفواكه للاله
مهرجان ميدينز او يسمونه مهرجان الاحبه وهذا للبنات اللي ما اعرسن يتجمعن يمكن تلقى لها عريس
مهرجان القمر وهذا المهرجان رايق يصلحون فيه كعك يسمونه كعك القمر ويولعون الفوانيس الملونه
مهرجان المحبين هذا شكله زين
مهرجان شنج ينج وهذا بعد مايصلون على القبور يروحون يطلعون الجبال>>>والله من الفضاوه

هذي بعض المهرجانات يعني كل السنه احتفالات ياحظ الطلاب مايدرسون الا اسبوعين بالسنه والباقي فله ووناسه



منظر لغروب الشمس في مكاو



اكثر شي لاحظناه حب المكاويه للحم مجفف



ميدان سينادو المرصع بالفسيفساء الملونه بالليل اجمل

من اشهر الشوارع عندهم شارع ايفيندا دي الميدا ريبيرو على ماتقرا اسم الشارع الا متعدي المحل اللي تبيه



بالليل مكاو شكل ثاني انوار الكازيونهات كانت قمة الروعه



بعد يوم حافل بالاثاره رجعنا لهونج كونج وجلسنا يوم فيها وبعدها سافرنا لدوله ثانيه
راح تشوفونها قريب ان شاء الله